星期六, 4月 07, 2007

香港精神

早前到沙田區的新豪宅睇風水,新豪宅與舊豪宅真係唔知點解有好大分別,舊一類豪宅舊建築,氣場好定,羅庚指針好少會狂轉,但現在的新樓宇可能多了許多埋於牆內的高科技物質,指針常會被干擾。幸好現在有地政署的精確地圖作最準確的度數參照,否則單靠羅庚真係唔知想點,最經典例子是驚天半島,試過幾個唔同生產地的羅庚指針都係咁轉,另外長沙灣一些新商業大樓也試過行前五步指針180度轉向,可謂方向大兜亂,所以,如果你叫古代的風水師黎睇現代城市風水,佢真係可能只會坐左係度,完全唔知點做,究竟新樓點解會咁?有機會找建築系的朋友為大家講解下。
客戶是生意人,關心的當然以錢財為主,主攻催財,擇日放上指定物件啟動氣場,近日客戶來電大談股票大講賺錢經歷,談如何可再谷勁一些,我記得電影《風雲》內釋武尊有類似一句對白:「一切太盡,緣份誓必早盡」,每個空間都有其飽和點,亦唔係每個財位都谷得,亂谷或谷錯反而會破財,但作為生意人,點會覺得會搵夠?總之要盡谷。
又曾有另一位客戶詢問,其朋友可到廟宇求一些唔知乜既催財物品番黎(話拜幾多日神加扣唔知幾多個響頭),話放係財位會勁好多,問我可唔可以放上去,本來果類野有宗教成份,同風水設計根本無關,亦唔須要理,但客戶好想放上去,點算好呢?回歸基本步,一切事物也分陰陽,也是五行物之一,於是便為將件金色東西分類,先看形狀,再看顏色,是否會自行發熱,是否神像.....有助動起財位的就放上,不利此財位就再搵適合位置放上。
「唔理點都好,總之我都會盡力死掂佢!」──依個先係由60年代到依家既真正「香港精神」!!(同我會做好呢份工concept上係唔係好相似呢?!)