悼念

默哀

數字學再思

數字預測是迷信?
可以係, 亦可以唔係. 要睇理論基礎及統計驗證.
客戶給我一個他女朋友的電話數值. 請教我給點意見. 一來尾數是2925. 天呀!!!!! 冇一個係好野. 主要原因係2本屬病土. 除非拍住6字互生互助即26利財, 但配個9埋黎, 即火生病土2仔. 後面再黎多個25, 2黑同5黃病星又合埋黎加強力量. 即係4個數值3個屬土再一個火黎生旺依堆負性土. 死未?
依d case好易斷證. 就咁係電話講"佢有病.內臟.水性部位".
客戶"...你點知呢?"
我"腎/膀胱/ 腦/ 耳出事 我斷係腎"
客戶"點睇既呢?"
我內心(好易睇.唔教你!haha,但結果都係開故) "3土一火生. 土極旺而且唔係當運旺運數值或配數. 你話係28 68 26尾數都話有得救, 但佢係隨機派來此number. 冇一個字係靚, 亦冇任何特定功能(例如用66 或 11 加強貿易交易又或者用17 78打劫之數提升投資運) 3病土結果係剋水, 女性而言最忌此數. 而水性部份就係頭先講既幾個. 剋得咁應. 腎出事最大機會."
客戶"係呀. 佢個腎有事!"

冇法子, 已同佢命格本身互動左, 改number, 風水, 改用色...etc都係後天改進生命提升五行的方法.
命理有部份人士加入騙術或神怪成份. 污染學說及術數. 冇法子. 可以搵到大錢就係咁. 雷曼都由各大歐美商學院精英畢業生設計左迷惑你債券出黎. 但是否代表投資既理論就係錯或根本冇投資致富呢?唔係. 要睇你學乜同基本水平係點.

命理師傅角色就係命運醫生, 你命運差時用盡所有方術及易理數術以至大的環境手術救人一命或盡力由負30分推番病者上0分.等同用自然環境既力量整個氧氣廂去救人或養住條命. 佢好運時幫佢加補品當係長跑馬家軍, (係唔係食禁藥就睇師傅水平), 但風水作為中國環境學問既一種技術而言, 就等同幫長跑健兒著多對超輕減壓避震跑鞋等佢爭取更佳成績. 又或者係游泳健將身上既超去水泳衣, 加左後係強化速度盡量爭冠軍. 個個都著件野咁就真係考你本命特質/真實能力. 但起碼俾多件野你游快d咁解.

有依套theory有依套技術都要你肯用肯試先得. 唔係都係當人發嗡風晒時間. 當然.都要每個人自己獨立思考一番先正路. 否則又會太過於盲目啦. 我倒自己米? 我都唔志在d米.夠食咪得o羅.

祝大家生活愉快.

生活嘈雜

好忙. 忙風水. 忙批命. 忙到冇停手. 但偷閒寫下blog鬆口氣.
我發覺好多人係facebook轉載上海世博抄野既日本電視台報導, 首歌係抄上海半官方地承認, 冇計,作曲家之過,評審委員會都唔係百科全書會聽過8幾年既日本流行歌, 8幾年既中國都係o岩岩開始聽香港歌,仲話聽日本?! 我唔會怪佢地. 但衰左就集體負責. 下次請多d國家既人做委員會著數d.

至於世博展館我又唔會覺得抄安滕忠雄囉, 講到明係源於中國"鼎"既意念亦解釋整過設計過程. 安滕忠雄果兩條大樑同展館根本兩樣野. 海寶又話係抄, 總之相似或有一忽仔"似"就係抄, 咁乜都係抄啦?! 我用水泥起樓用水泥好raw既interior design, 又屈我全抄安滕忠雄啦不如.

弱勢民族又有前科. 冇法子. 日本人都抄唔少德國技術. ipod 都俾人告抄自creative介面. 又俾nokia告抄野. facebook"創辦人"又係抄同學功課當自己發明. 全部用錢攪掂. 冇咩大文章可做. 睇番本地專欄, ipod facebook出事唔見多人寫. 中國一出事就大插特插樣樣都屈抽晒水. 專欄作家咪又係互相imitate. 抄自己幾日幾月幾年前文章再出又再出.抄人地concept當自己野. 係創作領域, 要告就黎告, 又唔見有人告中國館及海寶侵權?

首歌就肯定係侵左所以認左佢兼俾錢了事. 唔係話俾錢就正確, 但商業行為解決方式人地又肯仲有乜好嘈?!個個寫手搶道德高地光環上身,十九下流才子又借題發揮呃文字錢.香港社會水平就係咁. 老實. 睇內地雜誌文章內容,相片及排版以至文字功力及修養水平遠超香港幾條街.陳冠中講香港唔好攪咁多野.單食廣東省一小時生活圈果一億人已夠啦.爭乜鬼做中心呢?

悶聲發大財.真係唔出名好過出名.人地當你係敵人係咁走黎攪你打壓你阻你發展. 實係咁. 靜靜生活靜靜賺錢過自己既獨特生活就最好. 唔好攪咁多野.

題外話,香港政府效率肯定全球數一數二地高,當然唔代表佢perfect.邊有perfect架? 但我係香港生活感覺非常威好好.要白車有白車.要幫手有幫手.效率奇高! 消防白車最多係遲到十幾分鐘已俾報紙佬插到世界末日十惡不赦既罪,08年咁先進既日本東京都仲有大肚婆要生仔但俾七間醫院拒收遊救護車河幾粒鐘.阿婆發燒十間醫院冇位叫佢走之後死埋.澳洲友人同學俾人晚間市中心強暴,警察可以半粒鐘後先黎到,仲叫當事人算數實拉唔到人.美國警察巡黎巡去都係警局附近叫白車仲要俾錢.歐洲做野慢到死火車誤點誤到七彩,香港唔叫最好都已係極唔錯.就係新一代只識插政府唔識反省自己有乜貢獻,只識問人要野唔識自己整野.只識跟報紙亂吠唔識獨立思考.講到香港咁仆.快d番英國番其他國家啦.依度真係唔適合佢地.

依家成日講香港價值講香港人身份. 連自己都唔識欣賞依個地方只識跟風炒作(抄!). 八九十年代既香港價值一早已唔見晒.唯有自求多福!

忙碌期

命批多. 排長龍. 做唔完. 風水解決唔到我風水命批多到做唔完既問題. 真係同醫生差唔多. 醫到人地攪唔掂自己. 所有人都忙忙忙. 忙是好事. 忙到顧得這邊又顧不了那邊.

人手詳批愈來愈花時間, 其實是想找到平衡點, 早年買過詳批的, 現在友人再買已是一倍多的價錢. 而且我包保下一回將加價更利害. 可惜個人命批不可轉售，否則早年的命批已在增值中，就像手錶, 近期經攝影師友人之助買下一隻手錶, 不用排隊直接從行拎走. 又一次證明networking的重要, 史丹福大學一份報告指出個人的8成收入來自network,2成來自個人知識, 我是十分認同的.

依排見好多末日學說, 又話中國經濟泡沫2012爆破又話2011點點點衰.亂嗡一通.
最無聊係2012世界末日論, 真正的穿鑿附會. 但2012年尾經濟會點, 有收水現像是真的. 但不會郁下就爆!

公義

Mr Man又要趁過年前發嗡風啦.

老實. 幾十億同千億都已經係一個大到一個人其實冇乜概念既數字.因為當你擁有到一個好大既額度時,好多時已唔再睇細數做人.

放低佢啦施主.擺到明係慈善錢惠及社群既,就算/當係/假設 真係人地既意願,咪當幫大家積福囉. 有乜唔好呢!!

從社會公義角度而言,從人地一家人而言,從個人需要而言,梗係將舊錢回餽返俾大眾黎得有意義啦.唔好玩啦.
睇下公司背景,更加係唔駛再討論,公司反映內心.

依舊大錢用黎推動教育,提升市民既人文素質好過啦.
《麥兜》名句"算把啦.唔好攪咁多野啦"

新年異像

如果我2000年或十幾歲開始掌握一種預測賭馬賭錢賭乜賭物術而又中到幾百個. 我係唔係應該係依九年中係咁用依種方法係依十年去賭多幾百個或幾千個返黎呢?!

而唔係2010年無端端又記招又傳媒又玩神秘互"插/讚"大家學左個秘術執左幾百個分錢不公呢!而結果卻係最後於新年依個檔期大上電視各大傳媒呢?!我最想知點解依十年唔用秘術去賺番幾千個而要係依段時間追討番果一百幾十!

我會唔會太過批判,問依d看似無里頭卻覺得係一個局既問題呢!

算啦.結果都係marketing.唔好飲既水包裝完多人買.好飲既唔包裝唔喜歡包裝既就黎黎去去識貨既人去買.只係我睇得太多驚天大陰謀卦!

至於大陸既博士名稱.好老實.我太認識學術機構啦,因為我係phil programme既時間都有4年,本地大學工作加加埋埋都十年啦. 基本上我只會認為本地或英美排名前十既大學既phd先叫有少少保證.其他好多一律得啖笑.因為進入phil programme 既過程唔會兒戲,當然亦偶有把關失手收左連字都唔識既精神病學生,但排名高既大學好少有依d case,至於大陸,頭五位先好出黎講野,其他既,只要上網search下.有得請論文輔助員,輔助港台同胞寫論文,美國都有好多賣張cert既學校,所以都係笑下算啦.

所以我硬係覺得係一個局. 世界本是如此.

改名與五行

根據MR MAN 2009年既統計. 好多人生BB,因為改名次數大升幾倍! 2009年尤其後半年,真係睇辭典多過睇雜誌!

台灣依期又新興一種9宮改名法,將名字數理配飛星黎玩.點解依家會興?因為筆劃數改名法已out,太多人"識","識"到好多家庭自己走去買本書就去改名,得唔得呢? 得(心理上而言)

事實上,改名涉及八字五行之判斷,筆劃數其實好次要,於我而言,我會直接告訴客戶其實筆劃數之理論有問題,因為一個字最重要係佢既本身五行,即木字屬木,而唔係筆劃數中4劃所屬的火,水竟然唔係屬水,而係屬木!(筆劃數以一個字劃數總和尾數計算,12屬木34屬火56屬土78屬金90屬水,係死數黎) 我作為讀過下書既人就會質疑,文字由古至今不斷演變,筆劃亦會隨時代而改變,那一個字的五行從唐朝至今已有所增刪或變異,甚至書法之不同也有所增減,那這個字豈不是本質五行不斷變化嗎??

因此,筆劃之說只係一個形式(form)俾人容易去跟,但實效是存疑的. 但我改名要唔要考慮筆劃?我一樣會做,因為太多客戶受媒體市場所影響,認為筆劃數凶的話心理上不好過,所以最後還是要改一組從意義,筆劃數,到讀音,字義五行,字與字五行排序,字形以至卦理皆為吉數之名字.改一個客戶十幾個名常常便用上一星期研究,配合出來是否有詩意,又能否與客戶要求配合,還要考慮用此名字人數的多少,太多人用的名字也欠了獨特性.再進一步就是名字之外觀美感,字與字之間能否產生具詩意及正面的人生意義, 甚至預示BB未來的光明前景,名字結合起來可以講一個故事俾人知就更加好.名既典故,當中包含可與家族相關既故仔.第日都有得解下人知.

我就見過很多新手拿起台灣姓名學書本便即時師傅上身充當姓名學專家,改好一個名字後解說得似模似樣以為是大師風範,結果一看便知錯漏百出, 不找辭典辭源看就用上一些意像不好的字, 而自己卻將個人的理解大sell特sell此字眼, 結果是"累街坊"! 大家可有想過為何姓名學是由台灣傳回香港嗎?你去看改名書一欄.絕多數也是台灣書本,為甚麼呢?其一而我又認同的講法是當年日本來唐朝取經作文化交流,官員將次等甚至虛法送往日本好讓其得不到正確的理論程式,結果筆劃數之說一直在日本流存,及至台灣成為日本殖民地,筆劃之說扎根台灣,竟然成了姓名學的"正純理論"!!!世事真神奇!!!現在大家所看到的姓名學書本,如果真的那麼易來根據五行改名,就人人都可以去三中商買3本書回來大跟特跟改好名了!

另外.Mr Man更統計出一樣野, 就係所有改名客戶都係在remark中提出類似內容:想佢個B仔B女第日開開心心生活,活得自在,可以自己堅毅咁解決問題,健康快樂.做一個正直既人. 你睇佢地幾有修養, 好多時我一睇依類remark真係好感動,亦預示左此b仔b女有個格調高尚的家庭,有時候開八字一看,沒有擇時辰開刀的竟然7歲起順運60年,天干地支皆配合出全吉數!(好多時總之天干不利或一兩隻地支帶凶數) 而且係幾個唔同客戶都係咁, 又一次印證良好的家庭素質及教育,是孩童成功的最重要關鍵.

真係物以類聚架,我只會聚到有修養既改名客戶同長期讀者,好開心呢!

2009回顧展

今年是極Happy的一年,各項工作正面發展,學術地位也有所提升.客戶有讚冇彈,都真係好開心.健健康康快快樂樂.感謝大自然,多謝Gaia,多謝善良的人的正能量.多謝"阿凡達"令人反思經濟發展與自然的對立,令人反思做人,更可說De左極端既人本主義.睇完一刻令我憎恨自己作為人類身份果下犀利.

剛剛看tvb j2台,主持人竟然講虎年已到,我相信睇得我blog既稀有讀者都知, 立春日指定時間後才是虎年之始, 仲未到虎年呢.

2009年做了多項新工作, 認識了更多不同行業的客戶, 很高興呢.

最重要一項突破是在極緊急及短促的時間內設計了一間位於Sydney的apartment的風水,根本冇時間飛過去做依單野. 結果用上偉大發明google map的平面衛星圖及屋主寄來外在景觀相片將他的感情問題解決了.恭喜佢. 今時今日做風水單看羅庚真係唔多可靠,要用衛星圖先確定自然座向, 再比對室內量度的方位, 才可作最終結論, 如果只得兩者選一者, 事實上我更信前者, 已多次發現用不同地區出品的羅庚於同一地方量度,受磁影響不同下度數有明顯的偏差.

客戶講出正確住址後,google一search即時顯示出來,最經典是此大廈外型不是正方或長方型建築,而是部份不規則,難度更高, 幸好內局都算"猛車邊"叫四正, 計出吉星及救命星及連動情感線位置無阻礙物. 甚至要移動之傢俱及睡房更可調動. 做得多風水,有時我都不禁問,整定救得到架?!咁順既?!



講回今年得意之作,屋主因突發感情問題,誤會,幾十百樣前因...etc一次過引爆而愛人出走,睇睇八字,睇睇間屋.Confirm救得到.而且好似ER咁要把握急救時間.極速計算極速搜集用具再fedex極速運抵澳洲.你話古時或80年代冇internet點做得切?!搜集期間,一步步guide住屋主點做,調房,換床頭向,引動力量位及步驟逐一解說. 用具未到先做其他急救工作. 用具到後按擇日時間放上. (真係整定架喎,擇日有時成2個月都唔夾,今次1星期內就出現!!我當時於計算期間都大笑左出聲!!)

講下間屋,讀者睇開本blog就知咩叫火燒心,廚房居中.易攪.唔係影響關鍵.
先做飛星配數,24山,五行分析,夾八字.搵力量引動位. 依d case單用大家係電視見到既九宮飛星係救唔到.上電視上都市閒情果d大家笑下算啦. 因為引動位只係24格內其中2格仔內既小小位置. 放唔中就係唔中. 仲要考慮外在景觀與此格仔關係. 再化解負性力量格. 極有趣地間屋多左個門口, 咁巧合開出個救生門黎, 引動愛情力量入屋有此門.做少好多功夫. 攪掂幅圖後. (依幅唔係final version,秘技不會公開不會教授,坊間你見親十居其九係九格圖.就算真係見24格都未必真係識用.祝你好運.) 再email屋主. 著對方搬房, 搬家具,停用其中一間洗手間(Modern building就係中國人家庭十大武器之首既元凶,古人永遠將茅廁放屋外自有其原因,今時今日又病又盛好多時係廁所出事!),家人又配合佢肯幫手唔用果下夠團結!! 再俾些微心靈動力同勇氣佢. 額外送多一樣浪漫技巧. 內局完成等最少12日換氣.

等既期間,屋主負能量極大mail爆MR MAN email, 原來愛人離家出國以為佢唔返黎. 老實.救唔到退款事少,拆招牌事大. 去左第二個洲唔返黎喎!點得呀.但我心理質素良好冇理佢. 因為計過先出手. time and space夾得到又有物件幫手連動. 愛人重新心繫屋主, 結果由爆煲日起四星期後完成任務. 愛人自動返回身邊浪漫浪漫. File closed皆大歡喜. 大家開開心心過新年.

今年基本上順利非常,只是自己還有懶惰本質尚欠教授的2萬文字. 教授追殺中.救不了的竟是自己!Happy New Year.