上一篇文講及Mr Man所理解的香港精神(總之唔理點都好,我會幫你死掂佢),隔幾日睇報紙話溫總理叫曾特首為香港死而後已,當然,我唔認為溫總會為左果條23條(如果可以,改叫28條,包保順利好多!)叫曾特首死掂佢,但基本上死而後已正正係香港既特有打工仔/創業家大無畏精神.
睇左兩輯tvb《向世界出發》,梁詠琪去瀘沽湖摩梭女兒國, Mr Man於中大研究院第一年都去過,當時係先去昆明雲大開所謂學術會議交流論文, 但大家都係研究生, 內地同香港學生大家講完自己篇文基本上冇乜交流, 當時仲好野到個會明明agenda冇既流程,可以突然話有個清華黎既唔知乜野博士「剛巧」到雲大,佢有意見想發表就插左45分鐘俾佢講野,係冇交論文又冇主題既情況下用把口吹足咁耐水,當時第一次感受到內地文化果種「有朋自遠方來,不亦悅乎」既「唔駛講規矩文化」。
開完會 就梗係香港學生加教授(加埋都唔夠10個人)自己local tour, 教授們一早已打算去摩梭, 做晒research有晒歷史資料, 未去前仲有個讀緊雲大既master做導遊帶我地遊昆明,再加佢既男朋友仔─活佛先生. 活佛先生話想係寺內增設computer room等成班活佛仔眼睛遊世界,但各種文化及宗教原因下遇到好多阻力.大概都估到係果幾類原因.怕活佛仔受俗世資訊污染!(又話大隱隱於市?)
朝中有人好辦事,關左門既古城博物館可以打個電話就有人開門介紹,無記錯既話仲要係館長。另外又去左個摩梭民族館,入到去時好多女人係度鋤緊大dee,另一邊就玩排九紙牌, 一見我入黎就自動起晒身圍番個圈拖住手咁好投入跳舞同唱民歌, 依d咪係真正既 「方法演技」囉 !
玩完一輪,就用左8小時坐16座van到摩梭, 當時條公路仲未起好,係起緊,成條路凹凸不平,民工們就係訓晒係條路既兩邊,但架車都照行,沿途係好壯觀既山狹, 仲可以對住咁壯觀既峽景係條路上打邊爐,絕對係好有趣既體驗. 回程之時,去到一個位竟然有一隊交警又車又閘話條路未開放使用,嘩!唔係化,只得一條路wor,冇得用又點番昆明?!此時司機先生唔知係邊度搵到兩條萬寶路香煙出黎,係咁追住個隊長要佢接受小小既心意,我終於知咩叫做「欲拒還迎」,一路推開司機隻手叫「唔好」,一路又攬住兩條煙埋自己個身度,幾秒後所有公安唔見晒,乜block都冇晒,個feel好正.
途經虎跳峽就咁係馬路邊既大排檔對住個峽谷打邊爐,正!依家既摩梭,根本商業化晒,好彩趁大家仲未開發入去時就去左先,仲記得係瀘沽湖邊, 真係冇咩野好做.最後係旅館同prof大家對住個湖一齊打麻將,「碰」,輸左好多俾prof!去到摩梭條村,飲酥油茶(bb仔既嘔奶味道!)食綠豆粉噴到自己成面都係,夜晚個星空真係多星星多到墳滿左個天空，好正。
